Urte berriarekin batera, Lemniskata Zientzia Elkarteak ohikoa du urtarrila matematikari eskaintzea. AURTENGO EGITARAUA lau hitzaldik, bi erakusketek eta argazki lehiaketako sari banaketak osatuko dute.
Ostiral honetan emango dio hitzaldien zikloari hasiera Ignacio Royok eskainiko duen “Eulerren formula poliedrikoa: bitxi matematiko bat” hitzaldiak.
Urtarrilaren 19an Judith Rivasek “Matematika eta euskal dantzak” hitzaldia eskainiko du. 26ean, “Recreando maquinas geométricas antiguas” hitzaldia izango dugu Álvaro Martinezen eskutik. Eta amaitzeko, otsailaren 2an, Santiago Fernandezek “La belleza y el poder oculto de las matemáticas” eskainiko du. Hitzordu berean X. Lemniskata Nazioarteko Matematika argazki lehiaketako sari banaketa egingo dute eta otsailaren 11ra arte argazkiak ikusgai egongo dira Igartza Jauregian.
Gainera, Lazkaoko kultur etxean astelehenean ireki zen argitaratu gabeko Goierriko argazki zaharrenen bigarren erakusketa, urtarrilaren 19ra arte ikusgai egongo dena eta laster herri gehiagotara mugituko dena.
Aipatutako hitzaldi guztiak Igartza Jauregian egingo dira, arratsaldeko 19:00etan eta sarrera doakoa izango da.