Langile batzarrak egin dituzte CAFeko Beasain, Irun eta Madrilgo lantokietan lan hitzarmen berriaren proposamena bozkatzeko. Babes handiarekin onartu dute langileek abenduaren 4an Zuzendaritzak egindako proposamena. Enpresa Batzordea osatzen duten sindikatuek ere begi onez ikusi zuten abenduaren 4an aurkeztutako proposamen hau.
LABek helarazitako oharraren arabera, akordioaren oinarriak ondorengoak dira: lanpostuen sorrera Euskal Herriko planta produktiboetan, erretiro aurreratuak bermatzea, soldata igoerak KPlaren gainetik, azpikontratatuko lankideentzako lan baldintzen hobekuntzak, titulatuen kolektiboarentzako urteko lanaldiaren jaitsiera eta CAFeko langileen lan-baldintzen beste zenbait hobekuntza.
Hitzarmen berri hau 2023, 2024 eta 2025 urteetan egongo da indarrean eta 3500 bat langileri eragingo dio; Beasain, Irun eta Madrilgo lantokietako beharginei, hain zuzen ere.
Honez gain, aipamen berezia egin du LABek froga nabe berri baten eraikuntzan 9 milioiko inbertsioa egiteko konpromisoaren inguruan. Etorkizuneko frogetarako nabea kokatuko den lurzoruari erabilera produktiboa emateko aldarrikapena etengabea izan da sindikatuaren partetik azken urteetan.
Azkenik, sindikatuak honakoa borrokaren bidez lortutako akordioa dela azpimarratu du. Izan ere, lanuzteak egin dituzte azken asteetan.