CAFeko zuzendaritzak egindako hitzarmen proposamena datorren astean bozkatuko dute langileek

LAB sindikatuaren ustez, proposamen honek "eduki zabala eta askotarikoa" du eta "langileek azken asteetan aurrera eraman duten borrokaren emaitza da". ELAk berriz, "oso positibotzat" jo du eskaintza, hitzarmen honetarako ezarri zituen helburuak betetzen dituelako.
Enpleguari dagokionez, 390 kontratazio finko egingo dira, 180 Beasainen eta 40 Irunen. Gainera Beasainen 12 delineatzaile eta 5 prozesista kontratatzea proposatzen da. Honen aurrean, ELAk “gutxieneko plantillak finkatzea eta enplegu finkoa duen kontratazio handia” nabarmendu ditu. Eta LABek Euskal Herriko lantegietako enpleguaren “egonkortasuna” bultzatzen duela adierazi du “zuzeneko eskulaneko kontratazio ugari lortu ditugu”.
Zuzendaritzak Beasaingo altzairutegiko gune zaharrean 9 milio euroko inbertsioa suposatuko duen nabe berria eraikitzeko konpromezua hartu du. LABek “planta nagusietako enpleguaren aldeko apustua” dela uste du eta ELAk “berri pozgarria” dela adierazi du, “aspalditik eskatzen duen inbertsioa dela” adieraziz. 
Zuzendaritzak egindako proposamen honek mugimenduak jasotzen ditu langile beteranoen erretiroan, lizentzietan eta, oro har, lan baldintzetan.
Tituludun langileen lanaldi-murrizketa 20 ordukoa izatea proposatzen da. Horrela, ELAren ustez, “urrats garrantzitsua” ematen da, “gainerako langileek duten 1592,5 orduko lanaldira iristeko”. 
Soldataren inguruan, hitzarmena indarrean egongo litzatekeen hiru urteetarako KPItik gorako soldata-igoerak proposatzen dira.
Lizentzietan hobekuntzak ere proposatzen dira hainbat arlotan. Kontziliazioa bultzatzeko komisioa martxan jarriko da, distantzia plusa, 4 erreleboetako langileei jai egunetan lan egiteagatik %50eko igoera gehituko zaie, jangelako langileen soldata KPIaren arabera eguneratuko da eta telelana lanaldiaren %30 izango da. 
Bestalde, Castejongo lantegian paktu propioa garatzeko konpromezua hartu du zuzendaritzak.
Eskaintza berri hau abenduaren 12an bozkatuko dute langileen artean.