Beldur Barik topaketa Beasainen ospatuko dela eta Igartzan egin dute 2023ko ekimenaren aurkezpena. Gazteen artean indarkeria matxista eta sexista sahiesteko ekimena da hau eta Berdintasun, Justizia eta Gizarte Politiketako Sailak, Emakundek, hiru foru aldundiek eta Eudelek babesten dute. Hori dela eta Igartzan bildu dira erakunde hauen guztien ordezkariak.
Beldur Barik programaren baitan ikus-entzunezko lehiaketa da ekintzarik nagusiena. 12 eta 20 urte bitarteko gazteek egindako adierazpen artistikoak biltzen ditu non errespetua, parekidetasuna, askatasuna, elkartasuna eta indarkeria sexistaren gaitzespen irmoa aldarrikatzen diren aurkeztutako lanetan. Aurten 220 lan onartu dira lehiaketara, eta gehienak taldean egindakoak direla azpimarratu dute, "Sorkuntza prozesu bera hausnarketa kolektiborako gune bihurtzen delako, gazteen arteko eztabaida bultzatuz."
Sari banaketa ekitaldia abenduaren 1ean ospatuko da Usurbe Antzokian. Iban Garciak eta Annekdotasek aurkeztuko dute eta Alarma Morea taldea bertan izango da.