CAFeko langile batzarrak hitzarmenaren negoziaketa bultzatzeko lanuzteekin jarraitzea erabaki du aldeko 825 botorekin eta aurkako 411rekin.
Hainbat lanuzte egunen ondoren, Zuzendaritza Batzordeak hitzarmenerako laugarren proposamen bat aurkeztu duela eman du jakitera LAB sindikatuak. Honen aurrean, lanuzte eta presio neurriak bertan behera uztea eskatu zuten ELA, CCOO eta UGTk, bai Beasain, Irun zein Madrilgo lantokietan. LAB eta ESK, ordea, presio-neurriak eustearen aldekoak dira, ez baitute uste "langileak desmobilizatzeko behar besteko edukirik eta arrazoirik dagoenik".
Asteazkenean ospatu da mobilizazio eta lanuzteekin jarraitu edo ez erabakitzeko batzarra, eta Beasaingo lantegietan mobilizazioak bertan behera uzteko proposamenak 411 boto jaso ditu guztira, eta mobilizazioei eusteko proposamenak, 825 boto. Irunen 41 izan dira mobilizazioak bertan behera uztearen aldeko botoak, eta 172 mantentzearen alde. ELAk, CCOO eta UGTren babesarekin lanuzteak bertan behera uzteko egindako proposamenak Madrilgo lantegian egindako batzarrean bakarrik egin du aurrera. Mobilizazioekin jarraitzea onartuta, ostegun honetan bertan izango da hurrengo lanuztea Beasaingo lantokian.