Gaur emango zaio hasiera Bilboko Zinebi Dokumentalen eta Film Laburren Nazioarteko Jaialdiari, eta bertan parte hartuko du Igor Rezola beasaindarrak.
Larunbatean, hilaren 11n, "Ez Bultza Egin! (EBE!)" proiektu kolektiboa aurkeztuko du Bilboko BBK Aretoan, arratsaldeko 19:30ean. Sarrera doakoa da.
"Ez Bultza Egin! (EBE!)" Mawatresek eta Igor Rezolak zuzendutako proiektua da, eta zinema, musika eta artea uztartzen ditu. Katsuhiro Otomoren "Akira" du oinarri ikuskizunak, mangaren jatorrizko forman zein zinemarako egokitzapenean. Proiektu berri honen helburua AKIRA berrikusteko eta berrinterpretatzeko ariketa kolektibo bat egitea da, kultura- eta arte-ekoizpen garaikidearen ikuspegitik.
Horretarako, EBEk diziplina anitzeko lantalde hetereogeneo bat osatu du, artistak, musikariak, pentsalariak eta irudi/soinu teknikariak barne hartzen dituena. Hori guztia, Katsuhiro Otomoren lanarekin dialogatuko duten proposamen artistikoak (ikus-entzunezkoak/performatiboak) erakutsiko dituen ekitaldi batean formalizatuko da.