Igande honetan Frantziako Tour-aren bigarren etapa Beasainetik pasako da eta jada begibistakoak dira herriak jasan dituen prestakuntzak.
Leire Artola alkatea eta Aitor Escalante udaltzainburuak xehetasun guztiak eman zituzten atzo. Hau izango da Beasainen Tour-ak egingo duen ibilbidea:
Katea auzoa > Igartza Oleta > Dolarea > Zapatari > Trenbide kalea > Joan Iturralde > Zaldizurreta > Ezkiaga etorbidea.
Ibilbide honetan zehar, errepidea "garbi" uztea eskatzen zuen ekitaldiak eta jada bertan aurkitzen ziren hiri-altzariak, edukiontziak eta beste hainbat elementu kendu dituzte. Baita ere aparkalekuetan, hainbat hesi ipini dituzte.
Guztira 400 ibilgailu-plaza hustu beharko dira igandera begira eta aparkalekuak egokitu dira herritarrek autoa utzi dezaten:
CAF lantegiko aparkalekua edo Gudugarreta auzoan Estanda lantegiaren aurreko parking-a.
Ordutegiari dagokionez, lasterketa igaroko den herri barruko ibilbidea goizeko 11:30etatik itxi egingo da. 12:40tan lasterketako publizitateko karabana igarotzea dago aurreikusita eta horren arabera, 14:40etan lasterketako txirrindularien tropela pasako da.
Lasterketa igaro ahala lantaldea lanean hasiko da normaltasunera bueltatzeko eta 16:00-16:30ak aldera berriz trafikoa bere onera bueltatzea espero da.
Osasun larrialdirik egonez gero, ezin izango da ibilgailua erabili, baina 112 zenbakira deituta beraiek kudeatuko dute egoera.
Udalaren esanetan, Bestelako zalantzarik sortuko balitz egunotan, Beasaingo udaltzaingoarekin harremanetan jartzeko gomendioa zabaldu dute udal arduradunek egoera bakoitzari dagokion irtenbidea emateko (943 028080).