Ardiaren odol eta eta gaiekin egiten den hestebetea da mondejua Ataunen. Zaldibian egiten dena ez bezala, beltza da mondejua ataundarrentzat. "Belaunaldiz belaunaldi, gaurdaino iraun duen bizimodu baten adierazgarri" da Jentilbaratza Kultur Elkartearentzat eta, janari honen elaborazioa erakutsi, suspertu eta zabaldu nahian, ikastaroa antolatu dute urtero egin ohi duten bezala.
Bereziki gazteei eta baserri girokoa ez den jendeari zuzentzen zaie ikastaro hau, mondejuaren prestakuntzak segida izan dezan.
Irakaslea, Pili Barandiaran
Pili Barandiaranek emango du ikastaroa datorren larunbatean. Goizeko 10:00etatik 13:00etara izango da Aizkoate Elkartean.
Hala, mondejuak egiten ikasteko aukera izango dute interesa dutenek, Hala, behin mondejuaren sekretuak ezagututa, San Martingo festetan antolatzen den mondeju lehiaketan ere parte hartu ahalko dute nahi dutenek.
Ikastarora joan nahi dutenek izena eman beharko dute aurrez, 616 375 983 telefonora deituta. Izena emateko azken eguna irailaren 23a izango da.