"Mitokontuak", 5 ipuin, 5 kontalari

Euskal mitologia mendez mende ahoz aho transmititu da, eta Ataungo 2026ko Mitoaldiak tradizio horri ohore egingo dio “Mitokontuak” ipuin kontaketa bereziarekin. Aurtengo edizioan, ahozko narrazioaren artistek hartuko dute protagonismo osoa, gure sinesmen zaharrak eta istorio magikoak berriro ere biziberritzeko.

Kontalariak: Hitzen bidezko magiaren sortzaileak

Bost kontalari paregabe bilduko dira oholtza gainean, bakoitzak bere estilo, ahots eta eskarmentua ekarriz:

• Irati Marin: “Go!azen” telesail arrakastatsuan Izar pertsonaia gorpuzteagatik ezaguna den aktore tolosarra da. Interpretazio fisikoan espezializatua dago, eta txikitatik antzerki munduan murgilduta egon denez, gorputz-adierazpena eta presentzia eszenikoa nabarmenduko ditu kontakizunetan.

• Ixabel Agirresarobe (Usurbil): 1991z geroztik dabil ipuin-kontaketa lanetan. Ahoz aho jasotako istorioetan eta herri ipuinetan oinarritzen da bereziki, hitz jokoak erabiliz eta entzuleen parte-hartzea bilatuz. Haren kontakizunek kutsu folkloriko eta mitologikoa dute, nekazaritza giroko istorioei balioa emanez.

• Iñaki Carretero (Maturana): 30 urte baino gehiagoko esperientzia du istorioak, mitoak eta kondairak aletzen. Bere dislexiak ahozko zein idatzizko munduaren ikuspegi erabat berezia ematen dio. Berezitasun horri esker, entzuteko zein irakurtzeko zailtasunak dituztenak mundu magiko horretan murgilarazteko dohain paregabea du.

• Amaia Elizagoien “Ameli” (Oronoz): 2015etik ari da ipuinak ametsez josten, bai bakarlari moduan eta baita musikariekin batera ere. Bertsolari eta idazle honek hezkidetza, parekidetasuna eta laguntasuna ditu oinarri. Gure arbasoek egindako transmisio lana gaur egungo gizartera egokitzea da bere helburu nagusia.

• May Gorostiaga: Bere burua “Kultikultorea” bezala definitzen du. 30 urtetik gorako eskarmentua duen narratzaile, aktore, irakasle eta sortzaile honek umorearen iturrietatik edaten du. Berarentzat ipuin kontaketa “tribuaren topaketa magikoa” eta “hitzaren zeremonia” da, ikusleen irribarrea eta konpromisoa bilatuz.

Doako sarrerak hemen