Felix Urkola (Tolosa, 1970) izango da Bide Azpiegituretako eta Lurralde Estrategiako diputatu berria, Maria Ubarretxenaren lekukoa hartuz. Lazkaoko alkate izan zen 1999 eta 2007 artean eta 2019tik diputatu nagusiaren kabineteburu izan da.
Funtzio berriak
Bide Azpiegituretako eta Lurralde Estrategiako sailak izena eta funtzio berriak izango ditu, udalekiko eta eskualdeko erakundeekiko harremana hartuko baitu bere barruan aurrerantzean.
Bide azpiegiturei dagokionez, Diputatu berriaren zeregina izango da errepideetan ziklo berriaren oinarriak finkatzen jarraitzea, behin Gipuzkoako biribilgunea osatuta eta lurraldeko azpiegitura handiak martxan daudela. Aldi berean, gaitasun handiko bide-sarea eta bigarren mailako errepide-sarea mantentzea eta birgaitzea izango du helburu. “Horiek funtsezkoak baitira lurraldearen modernizaziorako, lehiakortasun ekonomikorako eta garapen sozialerako”. Arlo berria ez zaio arrotz suertatuko Urkolari, Plangintzako eta Kudeaketako zuzendaria izan baitzen Bide Azpiegituretako departamentuan 2007-2011 legegintzaldian.