Biziolak "Guk markoa zuk argazkia" ekimena antolatu du, argazki sormenaren bidez elikadura eskubidearei buruz hausnartzeko. "Goserik ez" da 2. Garapen Jasangarrirako Helburua, 2030 Agendaren baitan. Helburu hau herritartzearekin batera, parte-hartzea bultzatu, herritartasun kritikoa sustatu eta lanketa artistiko kultural baten bidez jendartea aktibatu nahi da.
Fotoahotsa metodologia berritzailean oinarritzen da ekimen hau. Ikerketa-Ekintza-Partehartzailearen (IEPH) baitan kokatzen den metodologia da eta, argazkilaritzaren bitartez, herritarrek haien errealitateak islatu eta hauen lanketa kritikoa egiten dute, eraldaketa sozialerako bide moduan.
Ekainaren 15era arte
Parte-hartzaileek elikadura eskubidea argazki bidez irudikatu behar dute eta norbere ikuskera hitzez labur azaldu. Gehienez bost argazki aurkeztu ahalko dira. Horretarako epea zabalik dago dagoeneko eta ekainaren 16an amaituko da. Adin guztietako goierritarrek har dezakete parte, norbanako zein eragile moduan. Argazkiak eta azalpen testuak, egilearen izen-abizen, herria eta telefonoarekin batera proiektuak@biziola.eus webgunera bidali behar dira JPEG formatuan.
Erakusketa Biziolan
Jasotako argazkien artean egindako aukeraketa batekin erakusketa egingo dute Biziolan uda hasieran. Erakusketaren iraupen tartean hausnarketa saio batean parte hartzeko gonbitea luzatuko zaie parte-hartzaileei.
Ekimen hau Kutxa Fundazioak Arantzazulab-ekin lankidetzan antolaturiko Hitzetatik Ekintzetara ekimenaren baitako Tresnak lehiaketaren ondorioa da, eta Gipuzkoako Foru Aldundiaren zein Eusko Jaurlaritzaren laguntzaz burutuko da, Europako funtsak baliatuz.