Apirilak 3an Lazkao Txiki hil zela 31 urte bete ziren eta data horren inguruan urtero egiten den moduan omenaldi ekitaldia egingo dute Lazkaon igande eguardian.
Aurten badirudi eguraldia lagun izango dutela eta ekitaldia bere ohiko lekura itzuliko da, hau da, Lazkao Txiki Zelaiara, bere estatua kokatuta dagoen plazara. Izan ere, azken urteotan euriagatik frontoian egin behar izan dute omenaldia.
12:30ean emango zaio hasiera Lazkao Txiki Gogoan ekitaldiari eta bertan musika, dantzak eta bertsoak izango dira. Urtero bezala Lazkao Txiki Musika Eskolak, Oin Arin dantza taldeak eta Goierriko bertso eskola parte hartuko dute Gerriko Kultur elkarteak antolatutako omenaldi honetan.