Errepresioaren bitartez jokabide edo antolakuntza bat prebenitu edo zigortu nahi izaten da, eta bere azken adierazpena pertsona edo antolakunde horren askatasuna desagerrarazi eta boterearekiko tolerantzia bat ezartzea izango da.
Historian zehar langile antolakuntzaren adierazpen ezberdinekiko errepresio forma anitzak garatu izan dira, baliabide teknologiko, juridiko eta kulturalez baliatuz. Hala ere, azpimarratzekoa da errepresioa ez dela biolentzia terminoetan ulertu behar, baizik klase terminoetan. Hau da, erreprimitzen dena, azken finean, langileriaren antolakuntza independentea baita, potentzial komunista duten adierazpen ezberdinak, eta errepresioa, azkenik, horien aurkako eraso sistematiko bat izango litzateke.
Estatuak, orden sozial burgesaren bermea izanik, metodo errepresibo ezberdinak erabiltzen ditu miserian hondoratzen doan langileriaren diziplinamendua bermatzeko. Horrela, zera bilatzen da:
- Miseriatik ihesi, espropiazio zuzenera jotzen duen langilegoaren kriminalizazioa. Okupazioaren aurkako ofentsibak eta lapurreta txikien zigorra handitzeak langilegoa kapitalaren erreprodukziora kateatzea dakar.
- Ezinegon soziala asimilatzeko askatasun eta eskubideak murriztea. Mozal legeak edota desordena publikoen delitua gogortzeak protesta sozial oro isilaraztea dute helburu.
- Antolakuntza politiko independentea ezabatzea. Atxiloketak, isunak eta mehatxuak erabiliz adierazpen iraultzaile oro itotzea dute helburu.
Hortaz gain, aipatzekoak dira segurtasun kameren eta presentzia polizialaren areagotzea, haien bitartez langilegoarekiko kontrol soziala handitzea lortzen baita.
Ondorioz, ekainak 3 eta 4an, Goierriko Kontseilu Sozialistatik “Errepresioaren aurkako asteburua” antolatu genuen. Hainbat ekintza egin ziren errepresioaren izaera eta adierazpen ezberdinak ikusarazteko asmoz. Hala, lehenengo egunean “Aukerak Giltzapean” dokumentalarekin eman genion hasiera, okupazioaren auzia mahai-gainean jarri, eta berarekiko existitzen diren ofentsiba forma ezberdinak jorratuz. Hurrengo egunean, kirol txapelketa bat izan genuen, non argazki erakusketa bat jarri zen, inguruan eman ziren errepresio kasuak azalduz. Azkenik, bazkariaren ondoren, elektrotxaranga batekin amaitu genuen asteburua.
Goierriko Kontseilu Sozialistatik, beharrezkoa ikusten dugu eskubide politikoen aldeko eta errepresioaren aurkako borrokari heltzea, borroka politikorako baldintzak eurak baitira jokoan daudenak, eta horiek gabe ez daukagu ezerrez.