Euskaltzaleen Topaguneak Mintzapraktika egitasmoen ikasturte berriari ekin dio. Orain 30 urte sortu ziren mintzapraktika programak eta ikasturte honetan ere milaka lagunek parte hartuko dute Euskal Herriko txoko ezberdinetan.
Funtzionamendua aski ezaguna da: euskaraz ondo moldatzen den pertsona bat, hizkuntza maila hobetu nahi duten lagun talde batekin elkartzen da eta hainbat gaien inguruan mintzatzen dira partekatzen duten denbora tarte horretan. Maiztasuna, normalean, asterokoa izaten da.
Egin nahi duzun hori, egizu euskaraz
Orain arte, mintzapraktiken formatua kafe baten bueltan elkartzea izan ohi da baina garai berrietara egokitu eta formula erakargarriak sortzeko beharra azaldu du Euskaltzaleen Topaguneak. “Hogeita hamar urte baino gehiago dituen egitasmo batek gaur egunean ere aukera erakargarria izaten jarraitzeko, eraldatzeko, moldatzeko eta eboluzionatzeko gaitasuna behar du izan. Pandemia garaietan onlinera egin zuen salto Mintzapraktikak eta horrek, mugak hautsi zituen munduan zehar sakabanatuta dauden euskaltzaleei ere euskara praktikatzeko aukera zabalduz. Poliki-poliki, egitasmoak beste behar batzuk asetu eta eremu berriak konkistatu ditu, geroz eta hartzaile anitzagoengana iritsi asmoz”. Horregatik, euskara praktikatzeko programa hau aisialdi praktika anitzetara zabaldu nahi da: yoga taldeak, mendi taldeak, antzerki taldeak,… “Aisialdia antolatzerako orduan, parte-hartzaileek ez dituzte bere zaletasunak mintzapraktika egiteko alde batera utzi behar, dena uztartu dezaketelako. Eta ez hori bakarrik, bere interes berak dituzten pertsona berriak ezagutu ditzakete, harreman berriak euskaraz eraikiz”.
Erabileraren mesedetan
Erabileran jauzi bat egiteko momentuan gaudela adierazi du Euskaltzaleen Topaguneak eta horretarako, Mintzapraktika tresna oso baliagarria dela azpimarratu. “Hiztegia bereganatzen, segurtasuna irabazten eta beldurrak uxatzen laguntzen die pertsona askori, poliki-poliki bere egunerokotasunean euskara erabiltzera animatuz. Euskal hiztun berriak mingaina dantzan jartzera laguntzen ditu, ezagutza eta erabileraren arteko jauzi hori era progresiboan eta segurtasunez ematen lagunduz”.
Mintzapraktika egitasmoetan izena emateko interesa duen pertsona orok, bere herriko euskara elkarte edo euskaltegira jo dezake, dauden taldeak ezagutu edo, zergatik ez, talde berriak proposatzeko. Bestela, www.mintzalaguna.eus orrialdean ere badago izena emateko aukera.