Herritar asko dira etxean animaliaren bat dutenak. Hego Euskal Herrian, zehazki, 432. 750 txakur, 57.770 katu eta bestelako 3.001 maskota daude erregistratuta. Dena dela, litekeena da zifra hauek errealitatearekin guztiz bat ez egitea: alde batetik, Espainiako Estatuan uste da txakurren heren bat ez dagoela erregistratuta (txipik gabe), eta hori arrazako txakurren proportzio txikiagoarekin lotzen da (guztiak erregistratzen dira); eta bestetik, ez dago argi errolda horiek sistematikoki eguneratzen diren (bajen benetako doikuntza). Hala ere, txakurrei dagozkien datuak dira adierazgarrienak izan daitezkeenak.
8.780 txakur eta 508 katu Goierrin
Goierrin 8.780 eta 508 katu daude erregistratuta. Gehienak Beasainen daude, baina datu hau logikoa da, udalerri honek baitu biztanle gehien. Ondorengo grafikoan, udalerri guztiek 100 biztanle balituzte, proportzioan zenbat txakur eta katu izango lituzketen ikus daiteke:
Argi antzematen da herri txikiagoetan txakur gehiago dagoela biztanleko. Berdin gertatzen da Hego Euskal Herrian, orokorrean.
Goierriko herrietan ere horixe da errealitatea. Beasainen daude txakur gehien kopuru absolutuetan, 1.653 hain zuzen ere. Hala ere, 10 pertsonako 1.19 txakur daude, proportzioan. Gabirian, berriz, 394 txakur daude, baina 10 pertsonako 7.43 dira.
Txakurren erabilera
Txakurren banaketa honek arrazoi ezberdinak izan ditzake. Batetik, herri txikiagoetan etxe handiak edota baserriak ohikoagoak dira, eta etxebizitza mota hauetan txakurrak izatea errazagoa izan daiteke. Bestetik, arrazoi garrantzitsua izan daiteke txakurrei ematen diegun erabilera. Gabirian, esaterako, txakurren %56.6 ehizara bideratuta dago. Idiazabalen ere erdia baino gehiago dira. Askotan, ehiztariek txakur bat baino gehiago izaten dute euren jardunean laguntzaile.
Beasainen, beste behin, %62a konpainiako txakurra da. Ordizian, %61a. Altzagan, berriz, txakur guztien %22a zaintza edo artzaintzarako erabiltzen da.
Ondorengo grafikoan Hego Euskal Herriko udalerrietako txakur kopuruak eta hauei ematen zaien erabilera kontsulta daiteke:
