Gipuzkoako Foru Aldundiak Gipuzkoako Parke Naturalen Eguna antolatu du. Atzo aurkeztu zuten “Harmonian eta lurralde-oreka berdea bermatuz gure ingurunea ezagutu, maitatu eta zaintzea” helburu duen ekimena.
Gipuzkoako azaleraren %15a diren lau parke naturalei eskainiko dizkiete lau egun horiek: Aizkorri-Aratz, Aiako-Harria, Aralar eta Pagoeta. Xabier Arruti Lurralde Oreka berdeko diputatuak “Gure biodibertsitatea zaintzeari, nekazaritza eta abeltzaintzako jarduera bultzatzeari eta gure aisialdiaz gozatzeari dagokionez, garrantzi estrategikoa duten lau bitxi direla” adierazi zuen.
Ospakizunak
Lau egun horien formatua antzekoa izango da eta hainbat ekintza antolatu dira: abereen eta artaldeen funtzionamendua eta zaintza azaltzeko saioak, eta Basabizi basa-fauna berreskuratzeko zentroan zonaldeko biodibertsitatea zaintzeari dagokionez egiten ari diren lanaren azalpenak nabarmendu dituzte.
Ondoren, palanka jaurtiketa herri kirola ezagutu eta palankarien erakustaldiaz gozatzeko aukera izango da eta Migel Zeberiok zuzenduta, Et-Incarnatus musikarekin amaituko da eguna.
Goierriko parke naturalak
Goierrin ekainaren 2a izango da lehen ospakizun eguna eta Aizkorri-Aratz parke naturalari eskainiko diote. Eta ekainaren 16ean Aralar Natura Parkearen txanda izango da.
Egun zehatz horietan soilik Aldundiak eskainitako doako autobus zerbitzuarekin bertaratu ahalko da parkeetara eta oinez gerturatu nahi izanez gero, elkartzeko puntuak Otzaurtetik Aizkorri-Aratz-era eta Lizarrustitik Aralar-era izango dira. Autobusetako informazio guztia gipuzkoanatura.eus wegunean zabalduko dute ospakizunaren aurreko astetik aurrera.