Gaur aurkeztu dute Beasainen Korale proiektuaren barruan kokatzen den ‘Kalelagun’ egitasmoa. Honen helburua, “Kalitatezko espazio publikoak diseinatzea, gozamen aktiboa, gizarte harremanak eta belaunaldien arteko harremanak errazteko, nahi gabeko bakardadeak arintzeko eta Gipuzkoa harremanen lurralde gisa indartzeko”. Bost herrialdek osatzen dute proiektua: Austria, Dinamarka, Irlanda, Belgika eta Portugal.
Barrendain plaza, bakardadeari aurre egiteko
Beasaingo Barrendain plaza aukeratu dute topaleku bihurtu eta plaza atsegin, eroso, irisgarri eta osasungarri izateko. Izan ere, Leire Artola Beasaingo alkatearen arabera, ‘Kalelagun bezalako proiektu aitzindari batean elkarlanean aritzeak bat egiten du Beasaingo Udalaren helburuarekin, beasaindarren bizi-kalitatea eta ongizate integrala hobetzearekin’.
Plaza berriaren obrak datorren urtean amaituko dira eta diseinatzeko prozesua oso parte-hartzailea izan da; izan ere, hogeita hamar pertsonak baino gehiagok hartu dute parte, besteak beste, hirugarren sektoreko eragileek, unibertsitatekoek, enpresek, erabiltzaileek eta Beasaingo Udaleko ordezkariek.